Deyerler.org Suriya haqqında niyə susur?

Deyerler.org saytının rəhbəri Hacı İlqar İbrahimoğlu
(Foto: Faktxeber.com)

Suriyada kütləvi qırğındır. Birmənalı olaraq. Amma Deyerler.org saytı bu barədə inadla susur.

Bəşər Əsədin rejimi ona qarşı çıxan hər kəsi — istər dinc etirazçı olsun, istər üsyançı — ət maşınından keçirir. Artıq Hələb və Dəməşqdə küçə döyüşləri gedir. Hər gün qətlə yetirilən mülki əhali haqqında xəbərləri oxuyaraq Suriyanın xəritəsini əzbər öyrənmişik.

Amma Cümə Məscidi dini icmasının rəhbəri, İctimai Palatanın Koordinasiya Şurasının üzvü, vətəndaş cəmiyyətinin dostu Hacı İlqar İbrahimoğlunun rəhbərlik etdiyi Deyerler.org xəbər saytı bu barədə inadla susur. Hətta mən deyərdim, bu qədər ucadan susur.

Suriyada qırğın başlayandan bir az maraq, bir az da ümidlə tez-tez Deyerler.org saytına baxıram, Suriya haqqında materialları axtarıram, deyirəm bəlkə… amma heyhat! Gəlin Deyerler.org saytında getmiş Suriya haqqında bir neçə təsadüfi başlığa baxaq:

Suriya ordusu Hələbin Səlahəddin şəhərini silahlı müxalifətdən təmizlədi – bu, Hələbdəki qırğın haqqında.

Suriya XİN-i: “Türkiyə aerodromlarını və sərhədlərini başda Əl-Qaidə olmaqla “cihad”çılara açıb”

Ayətullah Məkarim Şirazi: “Suriya hadisələrinin pərdə arxasında İsrail rejimi var”

Davam edək?

Məsələn, indiyə qədər 40-dan çox yüksək rütbəli məmur Əsəd hökumətini tərk edərək ya xaricə qaçıb, ya da üsyançılara qoşulub. Son belə şəxs — Suriyanın Baş Naziri Riad Hicab. Bütün dünya mediası yazır ki, Suriyanın Baş Naziri rejimi tərk edib əks tərəfə keçdi. Amma baxın Deyerler.org saytı nə yazır:

Suriya baş naziri Riyad Hicab istefaya göndərilib.\bbc\

O, bu vəzifədə iki aydan bir az artıq fəaliyyət göstərib. Bu haqda Suriya Dövlət Televiziyası xəbər yayıb. Baş nazir vəzifəsinə qədər o, kənd təsərrüfatı naziri vəzifəsində çalışırdı. Baş nazir vəzifəsinə müvəqqəti olaraq onun müavini Ömər Qələvənci təyin edilib.

Hələ BBC-yə də istinad ediblər. Amma BBC nə yazır? “Syrian Prime Minister Riad Hijab has defected from President Bashar al-Assad’s government to join “the revolution”, his spokesman says.” İngilis dilini bilməyənlər üçün – Suriya Baş Nazirinin sözçüsü deyib ki, nazir Əsəd hökumətini tərk edərək inqilabçılara qoşulub.

Bir sözlə, baş açmaq olmur, Deyerler.org yoxsa Suriya Dövlət Teleqraf Agentliyi?

Çox maraqlıdır, ayrı vaxt Ərəb baharından ağız dolusu danışan, Təhrir meydanında nümayişçilərin hər xırda hərəkəti haqqında sevincək xəbər paylaşan Deyerler.org saytı nə əcəbsə Suriya barəsində susur. Görəsən niyə Suriya cəbhəsində təbəddülat yoxdur?

Bəlkə çox hörmətli Hacı İlqarın da üzv olduğu İctimai Palata Ərəb baharını pisləyir və Suriya hökumətinin tərəfini saxlayır? Yoxsa Cümə məscidi dini icması Əsəd hökumətinin tərəfdarıdır? Bəlkə… İran icazə vermir? Yəni şiə həmrəyliyi bu dəfə də Deyerler.org saytının media etikasını və azadlıq təəssübkeşliyi üstələyir? Bəşər Əsəd şiə (daha doğrusu, ələvi) olduğu üçün, onu dəstəkləmək lazımdır? Sünni Mübarəki tənqid etmək olar, amma Əsəd özümüzküdür?

Hər gün bu qədər insanın qəddarcasına qətlinə susmaq, göz yummaq bir vicdan məsələsidir, amma heç olmazsa Deyerler.org kollektivinin nahiyə düşüncəsindən yuxarı qalxan bircə bəşəri dəyəri yoxdurmu?

Mən bu sualların cavabını bilmirəm, amma sizə bir əyani nümunə verə bilərəm.

Bir Suriyalı tanışım var, Məhəmməd. Atası Suriya səviyyəsində tanınmış yazıçıdır, dissident olduğu üçün uzun illər həbsxanada yatıb. Məhəmmədin qardaşı da uzun müddət həbsdə yatıb. Qardaşı etiraz nümayişlərini çəkib İnternetə yüklədiyinə görə hökumət onu axtarırmış, evlərinə gəliblər, amma evdə də tapmayıblae. Hətta əsgərlər onun gizləndiyi ehtimal olunan açarla bağlı şkafa bir maqazin güllə boşaldıblar. Bütün bunlardan sonra Məhəmmədin qardaşı İordaniyaya qaçmalı olub.

Məhəmməd özü də iki dəfə həbsdə yatıb. Sonra bir neçə il Livanda qeyri-leqal fəaliyyət göstərməli olub – Suriyada insan hüquqlarının pozulması halları haqqında mütəmadi olaraq beynəlxalq hüquq müdafiə təşkilatlarına və mətbuata məlumat ötürürmüş. İndi Vaşinqtondadır, orada Suriyalıların səsini eşitdirməyə çalışır.

Məhəmməd danışır ki, Əsəd hökuməti İnternet fəallarını tutanda onları işgəncə ilə məcbur edir ki, Facebook hesablarını açıb versinlər. Sonra oradakı məlumatlar və sair əsasında daha çox fəal tuturlar və beləliklə qapalı dairə davam edir.

Məhəmməd və dostları buna görə də Facebook ilə danışıqlar aparıb və razılığa gəliblər ki, hər hansı suriyalı İnternet fəalı tutulan kimi Facebook-a xəbər versinlər və Facebook onun hesabını yerli-dibli silsin. Təkcə Məhəmməd özü 500 nəfərin hesabını sildirib. Təsəvvür edin, 500 nəfər!

Hər dəfə Facebook’a daxil olanda bu söhbət yadıma düşür. Hər dəfə.

Advertisements

Ağalar Məmmədovun İsveçə sığınması barədə

Ağalar Məmmədov mühazirə vaxtı

Deyirlər ki, Ağalar Məmmədov İsveçdən sığınacaq istəyib. Xəbər nə qədər doğrudur, bilmirəm.

Xəbəri ifadə azadlığına patoloji nifrətlə öz oxucularına çatdıran Yeni Xürafat qəzeti belə bir cümlə ilə məqaləyə yekun vurub:

“Belə görünür, din əleyhinə çıxışlar etmək onun İsveçə mühacirəti üçün lazım olub.”

Bunu təkcə Yeni Xürafat yazmayıb. Artıq bir xeyli dindar, islamçı, şəriətçi də Facebook-da tutuquşu kimi bunu təkrarlamağa başlayıb.

Fikirləşirəm ki, nə qədər əxlaqsız olmaq lazımdır. Adama qarşı gecə gündüz nifrət körükləyəsən, ölümlə təhdid edəsən, təqiblərin əlindən adam evdən bayıra çıxa bilməsin, tədbirlərə gedə bilməsin, ya da getdiyi tədbirlərdə üstünə hücum edəsən. Axırda da adam bu vəziyyətdən bir çıxış yolu tapanda, deyəsən – o özü belə edirdi ki, xaricə qaçsın.

Bəs o zaman siz niyə onu təqib edirdiniz, öldürmək istəyirdiniz, cənablar? Siz də onu xaricə qaçırtmaq istəyirdiniz?

Əslində hadisələr tərsəmayallıq inkişaf edib.

Gərək Ağalar Məmmədovu Rafiq Tağı kimi öldürərdilər. Qaranlıq podyezddə, işdən qayıdanda. Ya da lap yaxşı olardı ki, Xəzər Universitetinin qapısı ağzında, dərsə gələndə, elə öz tələbəsi bıçağı ürəyinə soxardı. Sonrası da məlum məsələ.

Çingiz Sultansoy deyərdi ki, Ağalar tənqid etmirdi, provokasiya edirdi.

Hacı İlqar gənc tələbənin hüquqlarının müdafiəsi komitəsi qurardı və deyərdi, humanizm adı altında mənəvi terroru durdurun!

Onda Yeni Xürafat da manşetə çıxarardı: “İslamı təhqir edən filosof şoşkalandı!”

İctimai Palata isə… hmm, İctimai Palata.

P.S. Bax bu linkdə isə Hicab və Hicab Məhbuslarının hüquqlarının Müdafiə Komitəsinin Ağalar haqqında yazısını oxuya bilərsiniz. Bu insanlar sonra necə hicabı müdafiə edəndə utanmadan, qızarmadan demokratik dəyərlərə, insan hüquqlarına apelyasiya edirlər?

Rafiq Tağının qətli və səmərəli axmaqlar

Rafiq Tağı ölümündən əvvəl xəstəxanada
(Foto: Amerikanın Səsi)

Rafiq Tağının qətli xəbərini alanda Brüsseldə idim, Azərbaycanda insan hüquqları ilə bağlı çıxış edirdim. Çıxışın sonunda bir jurnalist qəfil mənə yaxınlaşıb Rafiq Tağının qətli ilə bağlı fikrimi öyrənmək istədiyini dedi. Mən ancaq bir dəfə belə şok olmuşdum – Emin və Adnanın həbs xəbərini alanda.

Bir neçə saat əvvəl özüm Rafiq Tağının sağalması haqqında xəbərləri oxumuşdum axı! Hətta jurnalistdən xahiş etdim ki, faktı bir daha yoxlasın. İlk reaksiyam bu idi: Ola bilməz! 

Onda jurnalistə nə dediklərimi bu xəbərdə oxuya bilərsiz, təkrara hacət yoxdur. Amma həmin məqaləyə düşməyən sözlərim arasında bunu da demişdim: “Mən Azərbaycanın dini icmasını da günahlandırmaq istəməzdim. İstintaqın nəticəsini gözləmək lazımdır.”

Nə qədər sadəlövh olduğumu indi xatırlayanda utanıram. Fikirləşirdim ki, özünü dindar hesab edənlər Facebook-da və ümumiyyətlə İnternetdə artıq bu qətli pisləyən yazılar paylaşır. Hacı İlqar başqa hadisələr zamanı olduğu kimi yenə də operativ şəkildə ilahiyyatçılardan və ictimaiyyət nümayəndələrindən aldığı mövqelərlə Deyerler.org saytının ana səhifəsini doldurub.

Amma həmin axşam otel nömrəmə qayıdıb kompüteri açanda gözlərim kəlləmə çıxdı. İslam dininin ardıcılları ya bu qətli təqdir edir, sevinirdilər, ya da deyirdilər ki, yığışdırın bu müzakirələri, bu qətl barədə susun!

Yazıçı, heç də sıradan olmayan bir yazıçı öz fikirlərinə və mövqeyinə görə qətl edilmişdi. Müsəlmanlar sevinirdi. Vaxtilə Rafiq Tağıya ölüm fətvası vermiş Ayətullah Lənkəraninin oğlu o biri Ayətullah Lənkərani gecikməyib müsəlmanları təbrik də etmişdi.

Kultaz.com
Kultaz.com

Sosial şəbəkələrdə bu qətl barədə kimsə narahatedici sual verən kimi isə elə öz “liberallarımız” onun üstünə düşürdü və ağzından vururdu. Yəni sus! Sən dindarları və dünyəviləri üz-üzə qoyursan. Sakit otur, qoy Rafiq Tağının ölümünü təqdir etsinlər, sevinsinlər, bayram etsinlər. Burada nə var ki?

Bir sözlə, Rafiq Tağının qətlində az qala bütün vətəndaş cəmiyyəti “səmərəli axmaq” rolunu çox asanlıqla qəbul etdi.

Əlbəttə, onlar çox təbii şəkildə iddi edirlər ki, bu qətli İslamın ayağına yazmaq, müsəlman inancı olan şəxsləri ittiham etmək olmaz, düzgün deyil, bu olduqca qüsurlu və zərərli ümumiləşdirmədir.

Amma Rafiq Tağının qətlini pisləyən və ədalətə çağıran dindarlar, dini qruplar hanı? Niyə həmin bu dindarlar elə sosial şəbəkələrdə Rafiq Tağının qətlində az qala Rafiq Tağının özünü günahkar çıxarırlar, onun ölümünün haqq olduğunu iddia edirlər? Bizim “səmərəli axmaqlar” bu dindarlarımı “haqsız, ədalətsiz hücumlardan qorumaq” istəyir?

Mən mötədil müsəlmanlara həmişə böyük ümid bəsləyirdim. Düşünürdüm ki, məhz onlar İslam dünyasını cəhalətin və özbaşınalığın pəncəsindən qurtarıb sivilizasiyaya çatdıracaqlar.

Ancaq Rafiq Tağının qətli ətrafında baş verən hadisələrdən sonra başa düşdüm ki, sanki hər bir dindar müsəlmanın içərisində, nə qədər mötədil olsalar belə, yekə bir Taliban yatır. Elə ki, fürsət düşdü, imkan əllərinə keçdi, və ya hakimiyyətə gəldilər, gözləri ancaq qan görəcək – hər addımlarında azad sözü, söz azadlığını, müxalif fikri, diskussiya mədəniyyəti, müxtəliflik və fərqlilik kimi şeyləri qanda boğacaqlar.

Necə ki, İctimai Palatanın son iclasında bunu gördük. Demokratiya adına mübarizə aparan bir qurum söz azadlığı yolunda qurban gedən adamın xatirəsini anmağa imkan vermədi – dindarların təhriki ilə. Bundan sonra İctimai Palatanın demokratiya mübarizəsinin səmimiliyinə necə əmin olaq?

Mən bilmirəm Rafiq Tağını kim qətl edib. Bəlkə dindarlar, bəlkə də provokatorlar. Amma bir fakt var ki, bu bizim hamımızı – həm cəmiyyəti, həm də dövləti narahat etməlidir. Azərbaycanda on minlərlə insan yetişir ki, onların qulaqları, ağılları və ürəkləri nə ailələrinə, nə AzTV-yə, nə Prezident Administrasiyasına, nə də İctimai Palataya qulaq asmır. Onlar bütün instruksiyalarını Qumdakı ayətullahlardan, Pensilvaniya və Türkiyədəki hocalarından, Səudiyyədəki müftilərindən alırlar. Lazımi andan onların kimin göstərişlərinə əməl edəcəkləri indidən məlumdur.

Bu insanları nə Nardaranda, nə də ki, Qusarın dağlarında axtarmaq lazım deyil. Onlar dövlət işində və biznesdə, vətəndaş cəmiyyətində və hökumətdə, ofisdə və əməliyyat sahələrində, daxili işlər ya da xarici işlər nazirliklərində, polisdə və universitetlərdədir.

Merkez.az

Və bu gün Azərbaycanı Azərbaycan edən bütün tapdalanmış, məhv edilmiş ideal və prinsiplərin ardınca ən fundamental prinsip – dünyəvilik, sekulyarlıq prinsipi də aşınır. Onsuz da bu gün maarifçilərimizin, həm birinci, həm də indiki respublikamızın qurucularının bizə miras qoyduğu prinsiplərə maksimum xəyanət etmişik.

Dünyəvilik prinsipində də hər hansı bir kompromisə yol versək, bununla öz qəbrimizi qazmış oluruq.

Əgər bu prinsipdən də nə vaxtsa imtina etsək, ona göz yumsaq, ya da onu tapdalasaq, Azərbaycan kimi mövcudluğumuza tamamilə son qoyulacaq. Aqibətimiz ya İranın 32-ci ostanı, ya yeni osmanlıların satteliti, ya da Qafqazın Əfqanıstanı olacaq.

Diqqətlə qulaq assanız, bu İslam inqilabının addım səslərini artıq eşidə bilərsiniz.