2 milyona Azərbaycanda inqilab etmək olarmı?

4792_src
Foto: Skaznov.livejournal.com

Belə bir klassik anekdot var – amerikalılardan soruşurlar ki, niyə sizdə inqilab olmur? Amerikalılar da cavab verir – çünki, bizdə ABŞ səfirliyi yoxdur.

Kütləvi təhtəlşüur az qala bütün inqilabları gətirib Amerikanın adına bağlayır. Oturublar okeanın o başında, amma hər söhbətin altında barmaqları var. Əslində belə təsəvvürün (daha doğrusu – təxəyyülün) mövcud olmasında əsas günah bəlkə elə Amerikanların öz boynuna düşür. Hər gələn yeni administrasiya geninə-boluna “demokratiyanın ixracından” danışır. Gəlib-keşmiş bütün Amerikan hökumətləri danışdıqlarının yüzdə birini əməldə etsəydilər, yəqin ki, bu gün dünya tamam başqa olardı. Amma necə deyərlər, tarixin “bəlkə” kateqoriyası olmur.

İndi də Azərbaycanın informasiya məkanında Amerikanın bizdə inqilab hazırlaması barədə söz-söhbət dolaşır. Jurnalist Eynulla Fətullayevin yazdığı və bütün TV-lərdə təkrarlanan tezislərə görə ABŞ 2 milyon dollar ayırıb ki, Milli Demokratiya İnstitutu (MDİ) Azərbaycanda “Facebook inqilabı” eləsin. Bəs görəsən Azərbaycanda 2 milyona inqilab etmək olarmı?

Əslində, bu söhbətlərdə yeni bir şey yoxdur – qarşımızda dünyanın özü qədər qədim və klassik konspirasiya nəzəriyyəsini görürük.

Eynullanın məqaləsini oxuduqca yaddaşımızda Sion Müdriklərinin Protokolları canlanır. Praqa məzarlığında toplaşan Sinedrionu qorxunc Dövlət Departamenti əvəz edib, Dünya ağalığı qurmaq üçün instruksiyalar verən Ravvini isə – oxşar dərəcədə mistik Aleks Qriqoryevs. Aleks Qriqoryevsi qapıdan qovurlar, pəncərədən girir, Moldovadan deportasiya edirlər Tbilisidə peyda olur, Moskvada qeybə çəkilir və birdən Bakının bulvarında gözə dəyir. Aleks osminoq kimi bütün Şərqi Avropanın, o cümlədən Azərbaycanın inqilabçılarını əhatə edən şəbəkə qurub. O, hər yerdədir və ayaq basdığı ölkədə dərhal hökumətlər yıxılır, inqilablar tüğyan edir.

Bəs kimin ağlına gələr ki, Aleks əslində kiçik bir ofisdə 3-4 işçisi ilə oturub səhər-axşam yorucu hesabatlar yazır və ictimai fəallıq haqqında yorucu təlimlər təşkil edir?

Beləliklə, ümumiləşdirsək, güya ki, ABŞ Azərbaycanda “Facebook inqilabı” üçün 2 milyon ayırıb və bu missiyanı “əbədi yəhudi” Aleks Qriqoryevsə tapşırıb. Aleks də Nidaçıları başına yığıb ofisində gecəyə kimi onlara Molotov kokteyli düzəltməyi öyrədir. Əsgər ölümləri ilə bağlı kampaniyanın arxasında da o dayanır. Dövlət Departamenti işini-gücünü atıb camaatı Facebook’dakı eventlərə dəvət edir. İlkin Rüstəmzadə isə Vaşinqtonda bir gizli idarədə quraşdırılmış kompyuterin yaratdığı illüziyadır.

Eynulla Fətullayevin məqaləsini oxuduqca başqa bir məsələnin də şahidi oluruq – bütün konspirasiya nəzəriyyələri kimi, bu nəzəriyyə də çoxsaylı fakt səhvlərinin, manipulyasiyaların və yanlış qənaətlərin üzərində qurulub.

Başlayaq elə “gecəyə qədər” MDİ-nin ofisində oturan Nidaçılardan. Məlumunuz olsun ki, MDİ-nin ofisində Nidaçılar gəlib otura bilməz. Məsələn, kimsə gedib ATƏT-in ya BP-nin ofisində səhərdən axşama kimi otura bilərmi, əgər o təşkilatlara aidiyyatı yoxdursa? Axı müasir iş etikası və iş qaydaları var. Ən azından MDİ-nin yerləşdiyi Landmark biznes mərkəzinə giriş-çıxış özü böyük bir prosedurdur. Ümumiyyətlə, MDİ gənclər təşkilatları arasında ən az əməkdaşlıq etdiyi təşkilatlardan biri Nidadır. Bəs bilirsinizmi ki, MDİ-dən ən böyük qrant alan təşkilatlardan bəlkə də birincisi hökumətyönlü AGAT-dır? Onda deyim, siz də bilin.

MDİ-ni Avroviziya ilə bağlamaq cəhdi də absurddur. Hamı bilir ki, Avroviziya ilə “Demokratiya üçün Oxu” kampaniyası məşğul olurdu. Həmin koalisiyaya daxil olan təşkilatlar bütün lazımi maliyyə və digər hesabatları qanunvericiliyin tələbinə uyğun olaraq müvafiq orqanlara çoxdan təqdim ediblər. Orada onların bütün donor və sponsorlarının, iştirakçılarının informasiyası var. Bu koalisiyanın MDİ ilə heç bir əlaqəsi olmayıb. Ümumiyyətlə, MDİ Avroviziya ilə bağlı heç bir fəaliyyət göstərməyib.

MDİ-nin bank hesablarından çıxardığı pullarla bağlı iddialar gəlincə, bunlar isə tamamilə absurddur. Beynəlxalq Təşkilatlarda işləyənlər çox yaxşı bilir ki, belə bir təşkilatın Azərbaycanda fəaliyyəti nə qədər xərc tələb edir. Ofis kirayəsi, məvaciblər, təlimlər, seminarlar, xarici ekspert və qonaqların Azərbaycana səfərinin təşkili, regionlara səfərlər, təlim zamanı iştirakçıların oteldə qalması, yemək-içməyi, səfər edənlərin rayonlarda otel xərci, dəftərxana və digər təchizatlar, adicə telefon danışıqlarına ödənilən xərc. Bir sözlə, üç il ərzində 2 milyon dollar MDİ kimi təşkilatın normal fəaliyyəti üçün əslində hələ azdır. Mən özüm başqa bir təşkilatın başqa bir layihəsində işləyəndə – büdcəsi 3-4 milyon idi – həmişə şikayət edirdik, çünki oxşar layihənin Gürcüstandakı büdcəsi 13 milyon idi. Üç il ərzində hesabdan çəkilib xərclənən bu 2 milyon əslində təşkilatın normal fəaliyyətinin əməliyyat xərcləridir. Yəqin ki, MDİ işçiləri də yemək yeyir, paltar geyir və ofis kirayəsi verir.

Həm də MDİ hansısa hökumətpərəst Azərbaycan QHT-si deyil ki, pulu bank hesabından çəkib nuşi-can eləsin. Bütün beynəlxalq təşkilatlar kimi, o da həm öz mərkəzi ofisinə, həm də qanunvericiliyə uyğun olaraq Azərbaycanın müvafiq dövlət strukturlarına vaxtaşırı hesabat verir.

Əsgər ölümləri ilə bağlı kampaniyaya gəldikdə – fikir verin, bu kampaniya başlayandan nə ictimai, siyasi fəallar beynəlxalq qurumlara, səfirliklərə apelyasiya edir, nə də beynəlxalq qurumlar, səfirliklər məsələ ilə maraqlanır. Xarici qurumların mətbəxini yaxşı tanıyan bir dostum o gün deyirdi ki, “xaricilər üçün mövzu maraqsızdır” – onlar Azərbaycan ordusuna hələ də Ermənistan-Azərbaycan münaqişəsi, konflikt prizmasından baxırlar. Bizim fəallar isə – mənim qənaətimdir – artıq özlərini o qədər güclü, əmin hiss edirlər ki, Avropa, Amerika veclərinə deyil. Onsuz da Kobia da, Morninqstar da bəyanatlarda üstüörtülü qeyd edir ki, Qərb bu hökumətin tərəfindədir. Aktivistlər də onlara əllərini çoxdan yelləyib. Əsgər ölümləri ilə bağlı kampaniya əsl grassroots , yəni “xalq hərəkatıdır”.

O ki qaldı, Amerikanın 95-ci il təvəllüdlü gənci güya öyrədib Molotov kokteyli ilə Azərbaycan hökumətini devirməsinə, onu deyim ki, Amerika belə xırda işlərə baş qoşmayacaq qədər ciddi dövlətdir. O, atsa atom bombası atar, İraqa, Əfqanıstana qoşun yeridər. Bir də ki, Erkin Qədirli demiş, “sizin çevriləsi dövlətiniz var ki”? Moskvada ya Vaşinqtonda kimsə qərara gəlsə ki, getməlisiniz, Xəzərin üstündən yüngül bir gilavar göndərsələr bəs edər. Heç xəzriyə də ehtiyac qalmaz.

11 Mart avantyurası – nə itirdik, nə qazandıq?

11 mart / Abbas Atilay, RFE/RL

11 mart – “Böyük Xalq günü” gəldi. Nə baş verdi? 50-100 nəfər çıxdı aksiyaya, yarısı tutuldu, haqsız döyüldü, buraxıldı.

Nə dəyişdi? Bəlkə rejim zəiflədi? Qorxdu, çökdü? Əksinə, hökumət fürsətdən istifadə edib qaykaları daha da burdu. İki vacib institutu – NDİ və İnsan Hüquqları Evini itirdik, iki gənci – Cabbar və Bəxtiyarı uzunmüddətli həbs gözləyir. Üç gənc hələ də inzibati həbsdədi. Gəncədə 3 QHT ofisdən çıxarıldı. Rayonlardan artıq xəbərlər gəlir ki, olan-qalan yerli QHT-ləri sıxışdırmağa başlayıblar.

NDİ gənclər təşkilatları üçün böyük bir treninq başlamışdı – Dalğa, OL, Müsbət Dəyişiklik, Azad Gənclik və digər tələbə və gənc təşkilatları üçün capacity-building, strateji planlama, strateji idarəetmə, sair üzrə təlimlər keçirdi. Bu proqram baltalandı.

Neçə illər açılması uğrunda hərfi mənada mübarizə aparılan İnsan Hüquqları Evi bağlandı.

Hələ bilmək olmaz hökumət sabah hansı tədbirləri görəcək.  Oxumağa davam et “11 Mart avantyurası – nə itirdik, nə qazandıq?”

Taylandda analoqu olmayan etiraz aksiyası

Tayland müxalifətçiləri (AP)

Assoşieyted Pressin verdiyi məlumata görə bu günlərdə Bangkokda etiraz aksiyası keçirən 100 mindən çox müxalifət tərəfdarı öz liderlərinin çağırışından sonra təcili sürətdə qan verməyə başlayıblar. Küçələrdə qurulmuş səyyar tibb məntəqələrində yığılacaq 1 milyon kub santimetr qanı müxalifət Hökumət Evinə tökməyi planlaşdırır.

Müxalifət liderləri parlamentin buraxılmasını və yeni seçkilərin keçirilməsini tələb edirlər. Əgər onların tələbi yerinə yetirilməsə, onlar bu simvolik qan qurbanını davam etdirərək, hakim Demokrat partiyasının qərargahını və Baş Nazirin evini də qana bulayacaqları barədə xəbərdarlıq ediblər.

Slavyan Universiteti tələbələrindən Təhsil Nazirinə boykot

Yeni Musavat qəzetinin verdiyi məlumata görə Bakı Slavyan Universitetində keçirilən görüş zamanı tələbələr təhsil naziri Misir Mərdanovu boykot ediblər:

Təhsil naziri Misir Mərdanov ciddi qalmaqalla üzləşib. Hadisə srağagün baş verib. Təhsil naziri Bakı Slavyan Universitetində (BSU) tələbələrlə görüş zamanı sərt etirazla üzləşib. Bu barədə əməkdaşımıza həmin görüşdə iştirak edən tələbələr məlumat verib. Onların sözlərinə görə, tələbələr Azərbaycan Dövlət Neft Akademiyasında baş verən qətliama görə Təhsil Nazirliyini də suçlayaraq təhsil müəssisələrinin təhlükəsizliyinin yaxşı təmin olunmadığını deyiblər. Onlar universitetin rektoru Kamal Abdulladan bundan sonra BSU-nun necə qorunacağını soruşublar.

Sualdan xoşlanmayan rektor və təhsil naziri onlara sərt cavab verdiyindən eyni cavabla da üzləşiblər. Tələbələr M.Mərdanovun universiteti tərk etməsini tələb ediblər. K.Abdulla isə onlardan sakit olmağı tələb edib və tələbələrin özlərini tərbiyəsiz apardığını deyib. Bundan sonra tələbələr görüşün keçirildiyi zalı nümayişkaranə şəkildə tərk ediblər. Rektor nə qədər çalışsa da onları zalda saxlaya bilməyib. Buna görə də təhsil nazirinin görüşü yarımçıq qalıb və bu görüş barədə heç bir KİV-ə məlumat verilməyib.

Tələbələrin şözlərinə görə, universitet rəhbərliyi bu hadisədən onlara təzyiq göstərmək istəsə də onların birliyini görərək bundan vaz keçib. Amma üstüörtülü şəkildə bildirilib ki, bu etirazın əsas təşkilatçıları tapılıb cəzalandırılacaq. Qeyd edək ki, baş vermiş bu olayla bağlı Təhsil Nazirliyinin və BSU-nun mövqeyini öyrənmək mümkün olmayıb.

Dalğaçı universitetdən xaric edilib

Dalğa Gənclər Hərəkatının yaydığı məlumata görə hərəkatın cənub regional ofisinin rəhbəri Pərviz Əzimov təhsil aldığı Lənkəran Dövlət Universitetindən qondarma ittihamlarla xaric edilib. Dalğa Gənclər Hərəkatının bu barədə yaydığı məlumatda deyilir:

Dalğa Gənclər Hərəkatının cənub regional ofisinin rəhbəri Pərviz Əzimov bu günə qədər göstərdiyi fəaliyyətə və yazdığı məqalələrə görə dəfələrlə universitet rəhbərliyi tərəfindən təqib və təzyiqlərə məruz qalmışdır. Nəhayət, 27 fevral tarixində qondarma ittihamla Pərviz Əzimov Lənkəran Dövlət Universitetindən xaric edilib. Xatırladaq ki, Pərviz Əzimov adı gedən universitetin 4-cü kursunda təhsil alır və bu günə qədər universitetdə heç bir problem yaşamamışdır. Təhsili ilə bağlı heç bir problem tapa bilməyən universitet rəhbərliyi ona qarşı qondarma təxribat təşkil etmiş, guya universitet daxilində dava saldığını əsas gətirərək universitetdən xaric etmişdir.

Biz Dalğa Gənclər Hərəkatı olaraq qəti şəkildə tələb edirik ki, bu qanunsuzluğa son qoyulsun və Pərviz Əzimov universitetə qeyd-şərtsiz bərpa olunsun və ona qarşı bu təxribatı törədən insanlar üzr istəsinlər. Biz qanunun öz yerini tapması və Pərviz Əzimovun haqlarının bərpa olunması üçün bütün qanuni vasitələrdən istifadə edəcəyimizi bəyan edirik. Hüququn aliliyi və insanların haqlarının bərpa olunması uğrunda hər bir kəsi bu işdə bizə yardımçı olmağa çağırırıq. Aidiyyəti orqanlardan isə bu istiqamətdə öz vəzifə borclarını yerinə yetirməyi tələb edirik.