Ədəbiyyat podkastı — kritikaparat

Azərbaycanın ədəbi-mədəni gündəliyi haqqında kritikaparat podkastı müxtəlif platformalarda artıq əlçatandır. Kritikaparat podkastı Azərbaycanın həm də ilk ədəbiyyat podkastıdır.

Son illərdə dünyada trendə çevrilmiş podkastlar üçün ekspertlər böyük gələcək vəd edirlər. Bəzi ədəbiyyat tənqidçiləri podkastların yaxın gələcəkdə ən geniş yayılmış ədəbi və publisistik janrlardan biri olacağını deyir.

Biz də, yəni mən Əli Novruzov, Cavid Ramazanov və Mirmehdi Ağaoğlu, belə qərara gəldik ki, Azərbaycanda podkast işinə azca töhfə verək.

Kritikaparat podkast seriyasında ayda bir dəfə buraxacağımız epizodlarda ədəbiyyat və mədəniyyət haqqında söhbət açacağıq və ölkənin ədəbi-mədəni gündəliyini müzakirə edəcəyik.

Kritikaparat podkastının ilk epizodu Seymur Baycan haqqındadır — aprelin 22-si yazıçı və publisist Seymur Baycanın 45 yaşı tamam olur. Ədəbiyyatımızın canlı klassikini müasirlik katerindən Xəzərə atmalıyıqmı?

Xoş dinləmələr!

Klassikin ad günü kritikaparat

Aprelin 22-si yazıçı və publisist Seymur Baycanın 45 yaşı tamam olur. Ədəbiyyatımızın canlı klassikini müasirlik katerindən Xəzərə atmalıyıqmı?

Telegram kanalı

Mən sosial şəbəkələrdən istifadə etmirəm, hər kiçik xəbəri və ya fikri yazmaq üçün də bloq bir az ləng mediadır. Bir xeyli götür-qoy edəndən sonra Telegram kanalı açmaq qərarına gəldim. Əsas məqsədim yeni yazılarımı və materiallarımı bölüşməkdir. Bir də bəlkə yazı üçün çox qısa olan maraqlı bir müşahidəm olsa, arada-bir bölüşə bilərəm. Amma çox yazan deyiləm, bildirişlərimlə sizi narahat etməməyə söz verirəm.

Telegram kanalımı izləsəniz, şad olaram: @anovruzov

Arzu Qeybullanın balaca dəcəlliyi haqqında

Tanınmış jurnalist Arzu Qeybulla mənim ona yazdığım bir məktubun screenshot-unu “nifrət nitqi” adı altında öz Facebook hesabında paylaşıb.

Problem məktub deyil. Məktubda qeyri-etik heç nə yoxdur, hətta nifrət də yoxdur. Bəlkə bir az şəxsi məyusluq var. Mədəni şəkildə Arzuya yazmışam ki, dostluğumuzu pozulmuş saysın. İstəyənlər Arzunun Facebook səhifəsinə girib “… biz necə nifrət edirik (yenilənir)” adlı albomda həmin məktubu oxuya bilərlər.

Problem odur ki, tanınmış jurnalist, kibertəhlükəsizlik və onlayn qısnama haqqında cild-cild yazılar yazan Arzu Qeybulla məktubun screenshot-unu paylaşanda mənim e-mail ünvanımı doxxing edib. Kibertəhlükəsizliklə məşğul olanlar doxxing praktikasının nə qədər qeyri-etik olmasını çox yaxşı bilirlər.

Onlayn qısnama kampaniyasına məruz qaldığını göstərmək üçün sübut-dəlil təqdim edən Arzu Qeybulla görünür ki, bunu yaxşı bilmirmiş (?!) – kiminsə iradından sonra bilib. Ona görə də məktubu silib, ikinci dəfə təzədən yükləyib, bu dəfə e-mail ünvanımı gizlətməklə.

Əslində, bütün bu texniki xırdalıqlar məni qətiyyən narahat eləmir.

Məni narahat edən artıq keçmiş dostum Arzunun riyakarlığıdır.

Mənim yazdığım məktuba Arzu hələ o vaxt cavab yazıb və yazışmada hər hansı nifrət və ya nifrət nitqi insinuasiyası qətiyyən olmayıb.

Əgər bu məktub nifrət nitqi idisə, niyə Arzu mədəni şəkildə yazışma aparsın mənimlə? Əgər nifrət nitqi deyilsə, o məlum Facebook albomunda nə gəzir?

Deməli mənim bilmədiyim başqa şeylər də var. Təəssüf edirəm.

Sonda isə həmin yazışmadan Arzunun mənə cavabını verirəm, doxxing etmədən.

Elman dayının xatirəsinə

Bakının mədəni həyatını onsuz təsəvvür edə bilmədiyimiz Elman dayı artıq bir ildir ki, aramızda yoxdur. Elman dayının İçərişəhərdəki kiçik dükanının dar qapısı vaxtilə mənim kimi minlərlə gənci Kitab Dünyasına aparan yolun başlanğıcı olmuşdu. Həzrəti İsanın dağüstü və’zində dediyi kimi, dar qapılardan keçin, çünki məhvə aparan darvazalar və yollar geniş olur və bir çoxları onlardan keçir.

Bu yazı Elman dayıya sonsuz təşəkkür borcumun heç cüz’i bir hissəsi də deyil.

Foto: adalet.az